Bir güni bir garryja ýaşula garap
Aýtdym adamlaryň üýtgeşigin sanap

Biriniň bolmasa-da ýekeje goly
Şol-da bolupdyrmyş dünýäň Çempiony

Ýene biriniň bolmasa-da aýagy
Ýeňijimiş küreklemekde gaýygy

Biri bar eken, hiç görmese-de gözi
On mergene degýärmiş, ýekeje özi

Biriniň bolmasa-da çeperje dili
Diňledip oturanmyş giden bir ili

Görüpdim bir serhoşy. (Aýtýanym dogry)
Şeýle bir meý içýärdi, ýok ýaly bagry

Bir husyt görüpdim, diňe pul geregi
Bilsem, ynsapsyzyň ýok eken ýüregi

Oýlansam ýene-de tapylaram yzy
Wagtym ýokdy. Şol ýerde kesipdim sözi

Boldum diýenimde sözlerimi jemläp
Ýaşuly bir es etdi, gözlerin geňläp

Uludan demin alyp, diýdi - han ogul
Bir ýerini kem galdyrdyň-la jan ogul

Ol aýtýanlaryň bolsa-da geň görülýän
Indi “Kellesizler” has-da köp görülýär


Ylham GURBANALYÝEW (2015)