Ýakynda, Moskwa şäherinde «Ak halatly gahrymanlar» atly Lukmanlar barada — 2021 Bütinrussiýa baýragynyň jemi jemlenildi. Bu baýrak ugrunda ildeşimiz ýagny, Moskwanyň A.S.Loginow adyndaky kliniki ylmy merkeziniň çanaklyk organlarynyň onkologiýa hirurgiýasy bölüminiň hünärmeni Muhammetsähet Saryýew «Moskwada iň gowy onkolog lukman» diýen ugurda birinji orny eýelemegi başardy.

Muhammetsähet Saryýew barada biraz durup geçsek, ol 2013-nji ýylda Aşgabatda Türkmen döwlet lukmançylyk uniwersitetini tamamlady. 2013 — 2015-nji ýyllarda ordinaturada okady. 2018-nji ýylda Russiýanyň Saglygy goraýyş ministrliginiň «N.N.Blohin adyndaky Milli lukmançylyk onkologiýa barlag merkeziniň» Federal Döwlet býujet edarasynyň aspiranturasyna girdi.

Muhammetsähet Saryýew dürli ýyllarda dürli wezipelerde ýurdumyzda zähmet çekdi. Ýagny ol 2015 — 2017-nji ýyllarda Saryýew Marynyň harby gospitalynyň «Ýörite hirurgiýa» bölüminiň müdiri, 2017 — 2018-nji ýyllarda Aşgabatda Enäniň we çaganyň ylmy barlag merkezinde ginekolog bolup işledi. Ol häzirki wagtda Moskwanyň A.S.Loginow adyndaky kliniki ylmy merkeziniň çanaklygyň düýbüniň onkohirurgiýa bölüminde onkolog lukman bolup zähmet çekýär.