SAKLAN, ÖŇDE ÇAGA BAR!

Ýüzi gülýän çagalar,
Gözi gülýän çagalar.
Bu gün siziň Günüňiz,
Ony bilýän, çagalar.

SSSR-li enäň-de,
Kese ýerli enäň-de
Birdir size bakyşy.
Maňlaýňyzdan öpende
Ýürekleriň böküşi,
"Jigerim, janym" diýip,
Ganatlaryn kakyşy.
Birdir olaň ýylgyrşy,
Birdir olaň gözýaşy...

Näme diýjek siz hakda
"Körpäm", "gülümden" başga.
Näme diýjek siz hakda.
"Balam, balymdan" başga,
Şundan gaty söz çykmaz
Meniň dilimden başga.

Kiçijegem bolsaňyz
Arkadagym sizsiňiz.
Ýüregimi ýyladýan
Gyzgyn çogum sizsiňiz.

Eneleriň güýji-siz,
Atalaryň güýji-siz.
Dünýädäki bar zatdan
Enaýy siz, süýji siz.

"Eçje, kakga" diýenje
diliňizden aýlansam!
"Çöçje, kökge" diýenje,
diliňizden aýlansam!
Biziň jahana inen
Ýylyňyzdan aýlansam!

Ýüzi gülýän çagalar,
Gözi gülýän çagalar.
Bu gün siziň Günüňiz,
Ony bilýän, çagalar.

Million, million çagany
Goramagyň güni bu.
Atomyny gezeýän,
"Uruş!" diýip dyzaýan.
Dili biçak uzaýan
Jeňbazlardan bir zady
Soramagyň güni bu:

Kime bakýar ýaragyň?
Saklan, öňde çaga bar!
Gapykmydy garagyň?
Saklan, öňde çaga bar!
Daşdanmydy ýüregiň?
Saklan, öňde çaga bar!
Saklan, öňde çaga bar!

BERDINAZAR HUDAÝNAZAROW