Bir-birine göwni ýetsin ynsanyñ,
Özkemine birazajyk uýalsyn.
Aklyña-a bar welin,ýòne goýalsyn,
Şeýleräk tùrkmeni göresim gelýär.

Ýokarrakda bolsun gyşyk geplerden,
Döşe kakman,goý,öwrensin köplerden.
Öz-özüñi arassala galplardan,
Şeýleräk türkmeni goresim gelýär.

Erkek erkek bolsun aýalam aýal,
Iññän gadymlardan gelýändir bu ýol.
Gursagyñda hyjuw,başyñda hyýal,
Şeýleräk türkmeni göresim gelýär.

Il bolsun, atyny ýeke çapmasyn,
Unutmasyn şol gadymy çatmasyn.
Ýöntemligi çenden-çakdan ötmesin,
Şeýleräk türkmeni göresim gelýär.

Görogly haýbatly,hemlesi bolsun,
Goý,agrasy bolsun,ýeñlesi bolsun.
Ýöne her kişiñ öz kellesi bolsun,
Şeýleräk türkmeni göresim gelýär.

Agzy aşa ýetse aýnaman bilýän,
Synaga salynsa ownaman bilýän.
Özúni oýnatman,oýnaman bilýän,
Şeýleräk türkmeni göresim gelýär.

Geplenýän gep,edilýän iş-saz bolsun,
Ýüreklerde iman,sözde duz bolsun.
Derleýän kän,gürleýäni az bolsun,
Şeýleräk türkmeni göresim gelýär.

Seniñ,mähek daşyñ agzybirlikdir,
Gedemlik etme,ol köre-körlùkdir.
Bir baýdaga gulluk etmek ärlikdir,
Şeýleräk türkmeni göresim gelýär.

Öñe gitjek bolma unudyp yzyñ,
Türkanarak bolsun geliniñ-gyzyñ.
Bize hemaýat ber,eý Allam özüñ,
Şeýleräk türkmeni göresim gelýär.

Pähimiñ,paýhasyñ gadyryn bilýän,
Öz aslyny bilýän,pederin bilýän.
Umuman özüniñ ederin bilýän,
Şeýleräk türkmeni goresim gelýär.

Bir-biriñi bagryña bas,dogan diý,
Hemmejämiz şu toprakdan dogan diý.
Gözel geljegimde gözüm eglendi,
Şeýleräk türkmeni göresim gelýär.

Berdinazar Hudaýnazarow