Tanyş ýollaň, gumaksyja ýodalaň
Gursagyna howur beren höwürtge –
Ak mekdebim! Sen öňümden çykýarsyň,
Hyýal guşum ganatyndan öňürtse.

Şatlyklar, gussalar, ýyllar hem ýollar...
Bir pursatda baryn gyra süýşüre,
Şindizem bir zada begenjek bolsam,
Öňinçäsi sen girýärsiň düýşüme.

Ynha, “A” harpyndan arşa göterip,
Ömrüme ak ganat eçilen ýeriň...
...Hasam hoş bolardym mugallymlarym
Gaýtalanda öňki geçilenleri...

Ýene şol pursatlar doldy-da kalba,
Geldim bu gün huzuryňa salama.
Geldim, ynha, ömür kitabyn açyp,
Şo-ol geçilenleri gaýtalamaga.

Kakamyrat REJEBOW.