GOŞJAN SEÝITMÄDOW
ÝAŞYL ÝAPRAKLAR
(Dowamy)
***
Kakasy ogluna 27 ýaşyndaka "Samsyk" diýip käýinýärdi. Indi kakasy 70 ýaşyndaka ogly oňa "Akmak" diýip käýinýär.
***
Ol gyz özüni soňky modada bezäp köçä çykdy. Onuň şu wagt dünýä göwni ýetenokdy.
Dünýäniň welin oňa göwni ýetenokdy.
***
Gar ýagýar. Soňam Gün ýalbyrap çykýar welin, gözüň gamaşýar gidýär.
Şol ýylpyldawuk garlar tebigatyň ýatan gözel zatlarynyň garyndysy bolaýmasyn?
***
Howa, tämiz howa äpişgeden edil gyz ýaly ýylgyryp girýär.
Tämiz howa äpişgeden çeşmäniň suwy ýaly sowujaklygy bilen, mähirli el ýaly mylaýymlygy, hoş habar ýaly ýakymlylygy bilen girýär.
Tämiz howa- bu biziň ömrümiziň gönezligidir!
***
Birwagtar gaş bejerjek bolup, gözi çykarýan ekenler.
Häzir welin tersine!
***
Ol ilden özüniň däl-de, kakasy bilen ejesiniň öwülýändigini eşidýärdi. Şoňa-da begenjinden iki bolup bilmeýärdi.
***
Ony işde oňat synap gördüler. Ilki satygçy, soň magazin müdiri, soň söwda ugrunyň ketdeleriniň biri boldy...
Indem ony ýeke adamlyk "jaýa" salyp, "çydamlylygyny" synap görýärler.
***
Bilmeýän bilýänden öwrenip bilgir boldy. Soňam bilgirden dilgir boldy.
***
Ol onuň ýüregini ogurlajak diýip, ömrüni ogurlatdy.
***
Ol şeýle bir gepleýärdi, şeýle bir gepleýärdi!
Hatda özüniň gybat edýänligindenem bihabardy.
***
Ol alma satýanyň mahabatyna ynansa-da, bagbana ynanyp biljek däldi.
***
Siz göze görünmeýän nokadyň bardygyny bilýärmisiňiz? Onuň nirede goýulýandygynam bilýärmisiňiz? Bilýän bolsaňyz örän oňat! Bilmeýänler welin ol nokadyň kineden, kemsitmeden, äsgermezçilikden, aldawçylykdan, gabahat garamatdan... soň, edil ýüregiň üstünden goýulýandygyny unutmasyn!
***
Ol gününi diýseň "hoş" geçirýärdi. Edarada başlygyna ýaranjak bolup gülse, öýüne geleninde-de aýalyna ýaranjak bolup gülýärdi.
***
Ol ýekeje ýalňyşlyk tapsa, ýüz ýerde gürrüň ederdi.
Emma özüniň mydama ýalňyşýandygyndan bihabardy.
***
Ony bütin il tanasa-da, ol ýeke adamy-da tananokdy.
Ony kimdir öýdýärsiňiz?
Piwo satyjy!
***
Onuň dişi, ýüzügi, goşaryndaky sagady gyzyldandy. Ýöne ýüreginiň gyzyldygyna welin güwä geçer ýaly däldi.
***
Tankytçy ýazyjyny tankyt eleginden geçirjek diýip, özi "eleksiz" galdy.
***
"Iki at ýok" diýip, hemişe zeýrenip ýören ikatýok mamlamy ýa-da 4 guzynyň 2-ni, 6 goýnuň 3-ni "ýok" eden çopan?
***
Gylyç egrem bolsa, keseninde dogry kesýär.
***
Ol külüni müň ýere dökse-de, abraýyny dökmändi. Sebäbi onda abraý ýokdy.
***
Deňziň gahary gelende bulutlar aglap ugraýar.
***
Zenanlaryň gözýaşy erkekleri oýlanyşmaga mejbur edýär.
**
Aýdymçyny şeýle bir öwdüler, şeýle bir öwdüler!
Soň-soň ondan öwmäge-de zat tapylmady.
***
Ol her gezek gürläninde kömek eden adamlaryny ýekän-ýekän sanap çykýardy. Emma özüne kömek edenleri welin bir wagt unudupdy.
(Dowamy bar)