AGLARA AGY ÝOK, GÜLERE - GÜLKI..."

Şatlyk paýlananda, gam paýlananda
Meň kalbyma gam düşüpdir bol-telki.
Şu gün — täze ömrüň ilkinji güni,
Ýa ömrümiň soňky günüdir belki.

Gije birmahalky gijä meňzänok:
Tutuksy. Garaňky. Alanok erki.
Şu gün — täze ömrüň ilkinji güni,
Ýa ömrümiň soňky günüdir belki.

Duýgulary garjamaga esas ýok,
"Aglara agy ýok, gülere — gülki".
Şu gün — täze ömrüň ilkinji güni,
Ýa ömrümiň soňky günüdir belki.

Bu duýgy umydyň şuglasy
ýa-da
Ertirimiň elhenç tümüdir belki...
Şu gün — täze ömrüň ilkinji güni,
Ýa ömrümiň soňky günüdir belki.

Sapa HOMMADOW.