Bir bolgusyz sebäp bozdy arany,
Seň ýoluňdan aýra düşdi men ýolum.
Indi bir-biregi görmedik bolýas,
Seň äriň gabanýar, meňem aýalym.

Ýogsam esasam ýok gabanmaklyga,
Soraşsak bes: «Niçik ýagdaýyň-halyň?..»
Ýöne biz şondanam çekinip ýörüs,
Seň äriň gabanýar, meňem aýalym.

Biz ölmesek, ölmez ýatlamalarmyz;
Ölmez ýürekdäki arzuw-hyýalam.
Muňa ikimizem düşünýäs kemsiz...
Seň äriň gabanýar, meňem aýalym.

Ýaşlyk ýyllarymy salyp ýadyma,
Sen barada goşgy ýazýan käýarym.
Arman, şonda adyň agzap bilemok,
Seň äriň gabanýar, meňem aýalym.

Italmaz Nuryyew.