Gördük saýy, köňül sowar
Sabyrsyz, kararsyz ärden;
Yssy beren köpek ýegdir
Uýatsyz, ykrarsyz ärden.

Aýlandykça döwran-döwür,
Ykbalyň ýüwürse, öwür,
Dura-bara dosty sowyr
Garyp galan barsyz ärden.

Ite zer dök, minnet çekmez.
Aňlamaza sözüm ýakmaz,
Köňlüň istän işler çykmaz
Nan ýagysy, kärsiz ärden.

Her göz säherde bidardyr, —
Eýesinden ülüş bardyr,
Hak, pygamber, halk bizardyr
Düýbi ygtybarsyz ärden.

Magtymguly, magny saçar,
Her kim söz lezzetin içer,
Bara-bara köňül geçer
Tagsyby ýok, arsyz ärden.

Magtymguly Pyragy