Sen ir gitdiň,

Dünýeden däl,

Dünýämden,

Soragsyz-idegsiz.

Gelişiň ýaly!

Maňa näme bolar?

Anyk bilýän men:

Men oňmaryn, emma ýüregmiň haly

Teň bolup, uçrasa dowasyz derde,

Asla, eger-eger geňem görjek däl.

Duýdansyz baryna çekdiň sen perde



Gitme diýip golum serjek däl, indem

Şonsuzam bilýäň-ä näme diýjegmi,

Çuňlugynda ot gaýnaýan göreçlem

aýdyp durka aýdylmaýan syrlarmy,

Syr bermejek bolup guran göreşlem

peýdasyzka peýda gözläp ne peýda

taparyn, galsam-da hernäçe derde?!

Gitdiň, görünseň-de maňa birmeýdan,

Duýdansyz baryna çekdiň-de perde.



Ýazygymmy ýazgydymyň ýazgysyn

özüm ýazmadygym?

Jogabyň hany?

Kagyza ýazdymmy bir söz — ýazmasyz,

Meni galam bilen eýlediň ganym:

Her pursat alamda men ony ele,

Sen gelýäň dile.

Geljegime goýan hasratyň bile

Öňe barýan ýollarymy ýoýduň sen.

Jellat gözlim, bakyşlaryň jan alar

Gözleň bilen gözlerimi oýduň sen.



Her säherde howlugardym saňa men,

Senem maňa,

Günler şeýle süýjüdi.

Arzuwlap-arzuwlap çykýan daňa men,

Sensizlikde söýgim has-da güýjedi.

Sensizligiň yzasynyň yzlary

Tagma bolup galar,

Şeýle-de bolar!

Ýüregim,

gözlerim,

ömrüm,

durmuşym —

Sensiz ýetim ýaly galdy-la olar.



Ömrümiz amanat — bu hemmä belli,

Bizde söýgimizem boldy amanat.

Bir, dünýede barlygyň-da teselli,

Indi şeýdip etmelimi kanagat?

Indi göýä Günüň nuram peseldi,

Günlerem geçenok soragyn sürtmän.

Men gorkamok ýatlamaga geçeni,

Seni unutmakdan şeýlebir gorkýan.



Birden, ýitip gitse gözden suduryň,

Soň näderin?

Soň keşbiňi görmenmi?

Oňmaly bormukam suratyň ogşap,

Gorübilmän görkden doly gözlerňi?

Suratlaryň dälmi — gijäň bir wagty

Mejburlap ellerme galam tutduran!

Gülüm, sen-ä ýeňdiň söýgi oýnunda,

Men — bijesiz!

Bijesini utduran!



Ýatlasam, ýene-de göresim geler,

Ýokmuka öňümde günleň bizligi?

Ýanyňa ýene-de barasym geler,

Baryp bilmerin:

Sen haýyş edipdiň görünmezligi...



Mukam MUHAMOW