Bir aýdym diňlärsiň käte...
Gaýta-gaýta...
​​Ganabilmän bir çende.
Haýranlar galarsyň ýaşalan ýyllaň,
Geçilen ýollaryň sähel pursada
hem birje owaza sygyp biljegne.

Aýdymlar diňlärsiň käte...
Olar kalbyň oklap biri-birine, 
Otdan-suwa, suwdan-oda atar-da,
Alyslara alyp gider ýüregňi,
Meňzäp durnalaryň nepis hatarna.

Käte-de hiç aýdym gozgamaz göwni,
Bu uly dünýäde göýä özüňi
Ýek-ýalňyz galansyň öýdüp başlarsyň.
Onsoň öz ýanyňdan täsin hiňlene,
Hatda özüňe-de saýry heň bile, 
Sen öz aýdymyňy aýdyp başlarsyň...

Kakamyrat Rejepow.