“Space Perspective” atly kompaniýa atmosferanyň stratosfera gatlagyna çenli çykarýan howa şary üçin sargyt kabul edip başlady. Müşderiler ýerden 30 kilometr (100 000 fit) belentlige çykmak üçin 125 müň dollar tölemeli bolarlar. Tölegiň içine ertirlik we dürli içgiler hem girýär. Kompaniýa arzan bahaly “kosmos” syýahatçylygyny ýola goýandyklaryny belleýär. Golaýda Jeff Bezosyň eýeçilik edýän “Blue Origin” kompaniýasynyň bir orunlyk peteginiň 28 million dollara satylandygyny göz öňünde tutsaň, bu hakykatdan hem örän elýeterli hasaplanýar. Kompaniýa biletleri satuwa çykarylandygy we syýahatçylaryň sekiz orunlyk gämi arkaly uçuryljakdygyny mälim etdi. Bildirişde ilkinji üç uçuş üçin boş ýeriň galmandygy mälim edildi. Syýahatçylygyň bu täsin görnüşi 2024-nji ýylda ýola goýlar. Ýolagçylar Ýere 360 derejelik burç bilen syn edip bilerler.