SÖZÜNDE TAPYLMADYK DERWÜŞ HAKYNDA HAKAÝAT

Üşbu hekaýatyň manysy şunda, Sözüňde tapyljak bolgunyň sen-de.

Çekip il-ulusdan özüni çete,
Bir diwana derwüş ýaşapdyr ýeke.

Dagda bar getirýän daragtlar känmiş,
Ol miweden başga iýmit iýmänmiş.

Ol özüne söz beripdir şeý diýip:
«Diňe ýere gaçan miwäni iýip

Oňaryn daragta elim uzatman,
Şu beren sözümde duraryn hökman.»

Ötegçilere-de ýüz tutmazlyga,
Çalşypdyr wadasyn unutmazlyga.

Günler yz-yzyna geçip durupdyr.
Şemala miweler gaçyp durupdyr.

Birdenem tebigat tutup kejine,
Şemalyň ösmesi kesilýär, ine.

Özem beýle ýagdaý çekip kän güne, Ýaňky derwüş düşenmişin kyn güne.

Öwüsgin ýokmuşyn daş-töwerekde, Ýekeje miwe-de gaçmandyr hatda.

Biçäre derwüşiň agzyn suwardyp, Şahalarda almalar dur gyzarşyp.

Armytlaram sallanşyp dur enaýy,
Oň başy aýlanýar bakdygysaýy.

Derwüşiň açlykdan eňkamy gidip, Ýolupdur miweden elin uzadyp.

Biz gowy iş etsek, görýäs mazasyn, Erbet işlermiziň çekýäs jezasyn.

Derwüşiň ýaşaýan ýerine dogry,
Gelipdir şol gije bir topar ogry.

Bir çola jülgede ykjam jaýlaşyp,
Ogurlan zatlarny telläp, paýlaşyp.

Uzak gije şagal mesligin gurap,
Duýup özlerini howpdan yrak,

Oturan wagtlary ertesi irden
Ogrularyň daşy gabaldy birden.

Ol iliň şeýleräk kadasy bardy
– Olar ogryň sag elini çapýardy.

Ogurlyga ysmaz ýaly boguny, Çapýardylar ogruň çep aýagyny.

Şo golaýda ýaşap ýören derwüşem
Bir söý bilen olaň içine düşen.

Oňa-da mynasyp jeza tapyldy
– Sag eliniň barmaklary çapyldy.

Aýagny çapmaga gezek elende, Nökerleriň biri dillendi şonda:

«Bakyň muňa, ogry küje, zat küje?
Jeza berip keramatly derwüşe,

Günä galypdyrys özümiz» diýdi,
«Indi ýiter biziň yzymyz « diýdi.

Jeza beren nöker barmagny çapyp, Derwüşiň alnynda dyzyna çöküp,

«Günamizi ötüň!» diýip ýalbardy, Derwüş şonda oňa bakyp, ýylgyrdy:

«Bu işiňe ahmyr edip ýörmegin,
Gaty dogry maňa jeza bermegiň.

Bozdum men özüme beren wadamy, Bozdum men gadymdan gelýän kadany.

Hut şonuň üçinem, seň eliň bilen.
Maňa berlen jeza Taňrydan gelen.»

Jelaleddin Rumy ,, Meni kalbyñyzdan gözläñ''.