SMS

Ine saňa ýene bir sms,
"Altyn asyr" büdretmänjik ýetirer,
Bagyşla gijräk ýazanym üçin,
Uklan bolsaň bytnamanjyk ýatyber.

Ertir oka, ýa birigün parhy ýok,
Geçirmeseň bolýar ony duşuňdan,
Emma bir bisähet baran hat üçin,
Galma süýji uky, süýji düýşüňden.

Ahyr bir gün wagt tapyp okasaň,
"Ýalta" diýme on iki harp kemledim,
"Sen meni söýýäňmi?" diýen soragy,
Aýdyp bilmän SMS-e jemledim.

Utanjaňlyk dillerimi baglaýar,
Gör şonda-da söýgi neneň hoşamaý,
Ýakynara MMS-em ugratjak,
"Meniň melhemim sen!" diýip düşünäý.

Kerim Hally