Tymsallar



Küştüň hikmeti

Bir hökümdar ogluny hat-sowatly, söweş tilsimlerinden başy çykýan edip terbiýeläpdir. Ýöne ýigidiň tiz pähim häsiýeti bar eken. Hökümdar oglunyň oýlanman, ölçermän bir iş etmeginden çekinýändigi üçin, geňeşmekçi bolýanyny aýdyp, akyl-paýhasy bilen tanalýan, başga welaýatda ýaşaýan ýaşuly adama hat iberipdir. Ýaşuly adamdan: «Ogluň küşt oýnamany öwrensin! Şonda ol sabyr-takatly bolmagy, her bir işe paýhasly çemeleşmegi öwrener» — diýen jogap gelipdir.

Haly hem edep berer, hem-de medet

Ir zamanda bir gaýry ýurtly eklenç üçin Merwe göçüp gelipdir. Ol il içinde sylanýan gojanyň ýanyna baryp maslahat sorap:

— Meniň bir oglum, üç gyzym bar. Oglum bilen özüm agaç ussasy. Ýöne gyzlarym ýaşajyk. Ile goşulyp gitmek üçin olara haýsy hünäri öwretse bolar? — diýipdir. Goja:

— Gyzlaryňy ussat halyçylaryň birine haly dokamagy öwrenmäge ber! Haly hem edep berer, hem-de medet — diýipdir.

Görki eden işinde

Bir barly adamyň ogly Bagdatda ylym alyp, obasyna gelipdir. Hossarlary ony öýerjek bolup, obanyň iň owadan gyzyna söz aýdyjy barmakçy bolupdyr. Ýigit ol gyzyň öýüniň gapdalyndan geçipdir. Gün guşluk wagty ol gyzyň göwünli-göwünsiz ýanlyk ýaýyp duranyny görüpdir. Gelip ejesine:

— Eje, ol gyza söz aýtmaň! Şu gyzgyn howada, guşluk wagty ýanlygyny göwünli-göwünsiz ýaýyp duran eken. Gyz maşgalanyň görki ýüzünde däl-de, eden işindedir — diýipdir.