Mydam öwsüp durmaz bu şemal başda,
Seni ýüregime gömer giderin.
Meñ göwnüm baharda, señ göwnüñ gyşda,
Bulutlañ göwsüni emer giderin.

Gözlerde monjuklar saklanar akman,
Şonda çal bulutlar gamlanar hökman.
Ýakamy galdyryp, yzyma bakman,
Gözlerñiñ çuñlugna çümer giderin.

Söýgim gaçyp galar ýyrtyk kisämden,
Seni ilki söýen, soñra küýsän men.
Seniñ sowuk suwly söýgi küýzäñden
Bir käse zäheri kemer giderin.

Soñra gurap galar joşgun çeşmeler
Yşkdan başga suw tapmasa teşneler.
Bir gün ýüregiñde bir ses eşdiler,
Şol pursat gözümi ýumar giderin.
Topragyñ bagryna damar giderin.

Sungat Gurbangeldiyew