Meniň bir gelnim
Şeýle bir gelin--
Beýle ajap gelin dünýäde ýokdur
Şeýle bir naharlar bişirýär welin
Kekre-de oň ýanynda tagamlyrakdyr

Aş bişirse--şerebedir şerebe
Çapady bişirse--duran bir daşdyr
Emma weli özi şeýle görmegeý
Özümem ýaş weli,
Gelnimem ýaşdyr,

Unaş bişirende--belkesi hamyr
Palaw bişirende--deň-ýary kesek
Çörek bişirende ýüzi gül-güldür,
Der-ýarysy küldür,
Deň-ýarsy kesek.

Çişlik bişirende--deň ýary kömür
Börek bişirende--öt ýaly ajy
Emma ýüregi bar duran bir göwher
Dilleri bar weli,
baldanam süýji.


Mundan öňki ömrüm biderek eken,
Indi üç ýyl bäri tukat günüm ýok,
Gaýgy,gussa diýilýän zatlaň
Adyn eşitsem-de,özün bilemok
Şeýle bir bälçik ol,
bir söz diýdigi
Adam bary burulup,
Şol güler ýatar

Üç ýyl bäri garnym gyzyl aç weli,
Şonda-da gaharym gelenok beter.

Ýeri,nädip oňa gaharym gelsin,
Ýüzüňe gyňralyp bakan mahalam,
Bir bälçigin aýdyp göýberýär welin
Şo bada güm bolup gidýär gaharym.

Onsaňam bir bälçikligin däl
Dökülýär elinden şeýle bir dürler
Çeken keşdesini gören adamlar
Başyn ýaykap,
ýaýkap,
ýaýkap giderler.

Alçaklyk,bälçiklik,eli çeperik,
Gyzlar üçin juda gerekdir welin
Jan eneler käte gyzlarňyzada
Nahar bişirmänem öwredeweriň....!!

Kerim Gurbannepesow
#ikinjipost'um