Gam-gussa bogulyp, oturma öýde,
Dünýä çyk, dünýä çyk, dünýä çyk, dünýä! Özüňden, il-günden etme-de öýke
Dünýä çyk, dünýä çyk, dünýä çyk, dünýä!

Dünýäniň reňki ýaşyldyr, aldyr,
Dünýäniň mazmuny aldawdyr, aldyr,
Onda şatlyk, gussa adaty haldyr,
Dünýä çyk, dünýä çyk dünýä çyk dünýä!

Seň derdiň nä, bardyr beteriň berki,
Rast sakla kaddyňy, et oňa erki.
Kimden kem kamatyň, bedeniň görki,
Dünýä çyk, dünýä çyk dünýä çyk dünýä!

Otursaň, ýürekde kan gussa jem bor,
Çyksaň, il seretse, derdiňe em bor,
Sensiz gamly dünýäň şatlygy kem bor,
Dünýä çyk, dünýä çyk dünýä çyk dünýä!

Ol gam berdi, a sen ona şatlyk ber,
Garry dünýäň gursagyna ýaşlyk ber,
Kalbyň tämizlensin hem saplansyn ser, Dünýä çyk, dünýä çyk dünýä çyk dünýä!

Däl sen hassa-bimar ýa-da keselli,
Gaýta dünýäň öz ahwaly peseldi.
Şoň üçinem sen ber oňa teselli,
Dünýä çyk, dünýä çyk dünýä çyk dünýä!

Atamyrat Atabaýew