Bagyşla, indi men saňa jaň etmen,
Barmaklarym tapmaz belli sanlary.
Tende yşkyň goduklaýşam, jähennem,
Goý, bimaza etsin özge janlary.

Dag gerşinde bulak akar, buldurar,
Oň şelaýyn sesin dereler ýuwdar.
Barybir ol dagdan çöle gelmeýär,
Barybir teşnäni gandyrmaz suwdan.

Günler gelmez – jemalyňy küýseden,
Ýapyldy yşk üçin açylan gapy.
Deňsiz-taýsyz gül saklanýar küýzede –
Hiç kimiň derdine degmeýär nepi.

Pursaty gaýtalap bolmaz täzeden,
Ol indi gelenok söýgiň elinden.
Kuwwaty ýetirlen meý dur käsede –
Hiç kimiň eliniň ýetmez ýerinde.

Penjiräni ýagyş kakýar – uşajyk,
Ökünç, ahmyr indi boldy giçkimi.
Tutaşan ot şatyrdaýar ses edip,
Ýöne indi ýylatmaýar hiç kimi.

Günleriňem üýtgärli däl gurluşy,
Bary birsydyrgyn çykan deý çapdan.
Haýp, barmaklaň janhowluna urnuşy
Barybir ýitirlen sanlary tapmaz.

Ýene bir Gün dagdan aňry sallanýar,
Munda oýun tamam, syryldy perde.
Alysda yşk şuglasyna aldanýar,
Indi başga biri,
Başga bir ýerde.