Käte ýanyp gezdim,
Käte tüsseläp.
Käte üşäp gezdim,
Käte yssylap.
Kä belentläp uçdum, käte pessaýlap.
Öz uçuşym.
Özge ganat küýsemen.

Bogulyp gezsem-de ýoluň çaňynda,
Egilip gezmedim adam öňünde.
Diňe Enem, Atam, Watan öňunde
Üç büküldim
Aýry kysmat küýsemen.

Söýüp gördüm,
Söýlüp gördüm dünýäde.
Kesewi dek köýüp gördüm dünýäde.
Arzuw atly gaçdy. Ykbal pyýada.
Döz gelipdim.
Indem aňsat küýsemen.


Kerräk bolsa - gulak bolsam adama,
Şerräk bolsa - ýürek bolsam adama.
Gerek bolsa - kömek bolsam adama -
Öwezine
Hüşür - zekat küýsemen.


Doglamda doguldym ak zada suwsap -
Ak süýde, aksakgal ussada suwsap.
Indi görüp ýörsem:
iň, ak zat - ynsap.
Ynsapdan ýokarda
Ussat küýsemen.


...Ýeri iňledip dur uruşly sowal.
Soradym toprakdan: - Niçik bor ahwal?
Diýdi: - Erkek erkek,
aýal hem aýal
Bolup bilse,
Başga myrat küýsemen!

Kerim Gurbannepesow.

* Goşgy gysgaldylyp alyndy.