Gör, näçe ýyl sensiz geçipdir, dilber,
Gör, näçe daşlaşdym seniň yşgyňdan. Seni juwan gyzlaň keşbinden idäp,
Idäp ahu-gözli gyzlaň çeşminden.

Ýene hiç zat çalşyrgyçsyz däl eken. Görseň, ine, gözlerine söweýin,
Bir zyba gyz otly söýgi bilen däl,
Mähri bilen tutdy seniň, öweziň.

Bar eken bagtyňam ýerin tutýan zat, Bozlap aýra düşen bagtymyň ornun, Tutdy akja gundagynda jägildäp, Däbşenekläp ýatan ilkinji oglum.

Belkem, yrgadyryn, durnuksyzdyryn
Ýa-da uýgunlaşyp ýürek zaryma,
Özümi ýitirip gam-gussa bilen,
Dönüp gidendirin başga birine,

Belkem, mejnun bolup söýen däldirin, Ýaşlygyň alydyr kalbymdaky ot.
Sensiz ýaşap bilmän ýören hallarym,
Göz öňüne getiribem bilemok.

Gör, näçe ýyl sensiz geçipdir, dilber. Galan ömrüme-de şu günüm bolýar.
Ýöne käte seni bagryma basyp,
Şeýle bir, şeýle bir aglasym gelýär.