Dostlugyň gadyry bilinse ýagşy

Gözelleň waspyny ýazýarsyň şahyr
Näme üçin ýazmaýaň dostlaryň hakda
Yşkyň derýasynda ýüzýärsiň şahyr
Näme üçin ýazmaýaň dostlaryň hakda

Şatlygyňa şatlanyp gülküňe gülüp
Aglaňda aglaýan dostlaryň dälmi
Başyňa iş düşse sençe gyýylyp
Bagryny daglaýan dostlaryň dälmi

Hassa günüň hassa halyňy sorap
Dermanyn gözleýän dostlaryň dälmi
Gybatyň etseler mertebäň gorap
Tarypyň sözleýän dostlaryň dälmi

Myhman bolsaň saçak ýazyp öňüňde
Nan-nygmat getirýän dostlaryň dälmi
Hezzetläp,hormatlap başa täç edip
Sylagyň ýetirýän dostlaryň dälmi

Eger işiň düşüp barsaň ýanyna
Minnetsiz bitirýän dostlaryň dälmi
Durmuş ýodasyndan büdürän günüň
Goluňdan göterýän dostlaryň dälmi

Iň ýakyn hossaryň ýakyn dostlaryň
Olar seň ugruňda bolýar jan serek
Eger sen olaryň gadryn bilmeseň
Olaň bar azaby bolar biderek

Gözelleň waspyny ýazýarsyň şahyr
Goý gözeller lezzet alsyn sözüňden
Ýöne gözelleriň waspyn ýazsaňam
Mähriban dostlaryň salma gözüňden