Umumy temadan
Pis gowyny gözläp nätsin,
Elbetde, pis-pisi tapar.
Adamlaryň gowşak ýerin,
Olaň gara nebsi tapar.

Süýt-süýt diňe gaýmak bolsa,
Em tapylsyn emgek bolsa,
Tirkeşýäniň tomzak bolsa,
Iň ýakymsyz ysy tapar.

Biliň guşap, goluň çyzgap,
Özüňi tap gözläp-gözläp.
Namart kişi özün gizläp,
Ýoldaşyndan kössi tapar.

Arzuw-yhlas ýerde ýatmaz,
Düzüw bolsa päl-niýetler.
Taňry gargan bidöwletler,
Toýy gözlär — ýasy tapar.

Ýigit geler iş üstünden,
Gyz ýylgyrar gaş astyndan,
Çyn yzçylar daş üstünden,
Ýöräp giden yzy tapar.

Ylham alyp höwesinden,
Sorup ýazyň howasyndan,
Ak çabganyň owazyndan,
Sazandalar sazy tapar.

Geregime däl tylla tagt,
Gözleýänim başga bir bagt.
Söýdügine duşan ýigit,
Kyrk çillede ýazy tapar.

Bak jahana aklyň durlap,
Kimler oýnap, kimler arlap,
Kimler bolsa derläp-derläp,
Iýiljek nan-duzy tapar.

Berdinazar Hudaýnazarow